Çfarë mbrëmje të mrekullueshme kaluam në eventin #GraQëFrymëzojnë organizuar nga Rrjeti i Grave “Barazi në Vendimmarrje! Përmes këtij eventi ne festuam suksesin dhe arritjet e grave dhe vajzave që frymëzojnë, çdo ditë, në çdo fushë, në çdo mënyrë dhe ishte vërtet një mbrëmje për t’u mbajtur mend!
Ne nderuam katër gra të mrekullueshme që kanë dhënë kontribut të rëndësishëm në fushat e tyre, duke përfshirë Brunilda Shiroka në Shëndetësi, Suzana Numani në Arsim, Marsela Çibukaj dhe Violeta Bejleri në Art. Historitë dhe arritjet e tyre ishin vërtet frymëzuese dhe na lanë të gjithëve të ndiheshim të fuqizuar dhe të motivuar për të bërë një ndryshim në jetën dhe komunitetet tona.
Ky event solli gjthashtu plot surpriza, të qeshura, këngë dhe mesazhe frymëzuese që mbushën hapsirën me pozitivitet dhe energji të mirë. Ishte një mundësi e shkëlqyer për gratë dhe vajzat për të ndarë përvojat e tyre dhe për të frymëzuar njëra-tjetrën përmes modelit tyre.
Jemi krenarë që kemi krijuar nismën #GraQëFrymëzojnë që prej vitit 2018, e cila synon të promovojnë modele të grave dhe vajzave në shkencë, politikë, art, histori, sport dhe teknologji nga e kaluara dhe e tashmja. Gjatë viteve të kaluara, kjo fushatë ka arritur tek më shumë se 100.000 njerëz.
Le të vazhdojmë të festojmë dhe të lartësojmë arritjet e grave dhe vajzave kudo. Së bashku, ne mund të krijojmë një shoqëri më të barabartë dhe gjithëpërfshirëse për të gjithë.
