TIRANE – Konferenca e organizuar nga OSBE-ja ‘Për rritjen e rolit të gruas në qeverisje’ uli këtë të mërkurë në një tryezë, kryetarin e PS-së Edi Rama, kryeparlamentaren Jozefina Topalli dhe liderin e LSI-së Ilir Meta. Të pranishem dhe disa deputetë të Kuvendit të Shqipërisë.
Ambasadori i OSBE-së në vendin tonë, Eugen Wollfarth deklaroi se gratë në Shqipëri vazhdojnë të jenë të papërfaqësuara në politikë.
Në konferencën për rritjen e rolit të gruas, në Tiranë, ambasadori Wollfarth e cilësoi të papranueshme dhe të pandershme përjashtimin e grave nga jeta publike.
“Mundësitë për gratë, që të jenë pjesëmarrëse aktive është një parametër thelbësor i demokracisë funksionale. Nuk është e mjaftueshme që të ketë një pjesëmarrje të vogël të grave në jetën publike” theksoi ambasadori i OSBE-së.
TOPALLI: GRUAJA KRIJUESE, BURRI SHKATERRUES
Kryetarja e kuvendit, Jozefina Topalli deklaroi se çështja e fuqizimit të gruas është globale dhe trajtohet në të gjitha shoqëritë e botës. Sipas Topallit, gruaja është më krijuese, në krahasim me burrat dhe ndikon pozitivisht në procesin e vendimmarrjes, ndërsa burrat kanë natyrë shkatërruese. Kryeparlamentarja theksoi se ka një kontradiksion të madh mes asaj që themi e asaj që shohim, në lidhje me pjesëmarrjen e gruas në jetën publike.
“Është një rast për të ngritur pyetjen se sa është realizuar premtimi për pjesëmarrjen e gruas në politikë? Në nivel global, gratë përfaqësohen vetëm 20%. Janë bërë përpjekje dhe ka arritje të ndjeshme për rritjen e rolit të gruas në Shqipëri.” -theksoi Topalli.
Kryetarja e kuvendit nënvizoi se çështja e barazisë është çështje e së drejtës, e cila nuk duhet të deformohet.
RAMA: BASHKARISHT TË SHTOJMË NUMRIN E GRAVE NË VENDIMMARRJET POLITIKE
Kryetari i Partise Socialiste Edi Rama në fjalën e tij sot në konferencën ‘Për rritjen e rolit të gruas në qeverisje” u shpreh se është koha që të punohet bashkarisht që të rritet roli i gruas në vendimarrje politike. Me nota humori Rama iu përgjigj deklaratës së Topallit për burrat shkatërrues.
Kreu i PS tha se nëse parlamenti do të kishte më shumë gra në përbërje, korrupsioni në vend do të ishte më u ulët falë vendimarrjeve jo të korruptuara.
“Jam i bindur sikur parlamenti të kishte këtë përbërje, pa dyshim do ishte më i efektshëm, këtë e them jo për fjalën e rastit, por jam i bindur sesa më shumë gra të përfshihen në vendimmarrjen e këtij vendi, aq më e pakorruptuar do ishte vendimmarrja. Por, sa më shumë gra të ishin në parlament, spikeren do të ishte mirë ta kishim burrë, më fal znj,Topalli”.
Rama falenderoi më pas misionin e OSBE për këtë nisme që ka ndërmarrë në Shqipëri mbi rolin e gruas, ndërsa sugjeroi që të futen sa më shumë gra në listat e zgjedhjeve politike.
“Në rast se një parti politike merr përsipër për një pjesmarrje mbi 30% të grave dhe kjo do ishte në linjë horizontale jo vertikale, si në rrethe, si në komuna si në qarqe, do ishim në rrugë të drejtë. Ky është një propozim i bërë dhe në periudhën kur diskutonim për periudhën zgjedhore. Unë mbeta në minorancë jo vetëm me PD, por dhe me burrat e partisë sime. Është koha ta realizojmë”.
Ai solli më pas si shembull Kongresin e PS ku theksoi se luftoi për të rritur numrin e grave në anëtarësinë e PS, porse kjo përgjigje nuk erdhi pozitive nga kryetarët e PS-ve në zonat rurale.
Sa i përket zonave rurale, Rama tha se po shtohet alarmi rreth rolit të gruas në këto pjesë të Shqipërisë.
“Ajo që po ndodh në Shqipërinë rurale me gruan ndrydhjen dhe mbylljen e saj në shtëpi duhet të jetë alarm për të gjithë ne”, tha Rama ndërsa theksoi se shumica e grave në Shqipëri janë të papuna dhe shume dhunohen ndersa autoret nuk ndëshkohen.
“Këto barriera duhen shembur përfundimisht”, tha kreu i PS.
Rama për burrat shkatërrues
Deklaratës së kryetares së parlamentit Topalli, se gratë janë krijuese krahasuar me burrat që janë shkatërrues, Rama e komentoi “Më lejoni ti vë pikën fjalimit, se jam dakort me atë që tha Topalli, që gruaja është krijuese, por burrat mos t’i quajmë shkatërrues, por bashkëautorë”.
“Me ndihmën e grave të forta në PD jemi gati të bëjmë gjithcka për të influencuar mbizotëruar burrat shkatërrues”.
LSI, META: MBËSHTETJA NDAJ GRAVE TË JETË PRIORITET
Kryetari i LSI-së, Ilir Meta theksoi se forca politike që ai përfaqëson ka garantuar pjesëmarrjen e grave prej 30% në forumet drejtuese.
Lideri i LSI-së nënvizoi se mbështetja e grave duhet të jetë prioritet i çdo qeverie, i çdo force politike dhe shoqatave të grave.
Recent Comments